هزرنا كتير في الحلقة الأولى ومطلعناش منها بحاجة مفيدة ... ندخل ع الجد بقى
احم احم ...
نبقى قاعدين بنرغي سوا في آمان الله ألقى سارة بتقوللي هي آلاء راحت فين ؟!
أنا : أكيد ماتت
سارة : كانت طيبة والله
أنا :ياللا الله يرحمها
واذ فجأة واحنا بناخد العزا في البُنية نلقى براشوت هابط علينا تقول "كنت بابيع" .... طبعا دي آلاء ... بتبيع بقى شامبوهات وفلايات ومعجون اسنان وبامبرز وكل اللي نفسك فيه هتلاقيه وكمان بتبيع فياجرا (ايه ده هو احنا هنبدأ قلة الأدب من دلوقتي ... والله بقى هي اللي دايما تحكيلي عن حجم مبيعات الفياجرا عندها .... بت قليلة الأدب صحيح ) ...
احم احم (نظرة جادة ونرجع لموضوعنا بلاش قلة ادب)
آلاء بقى اسم الله عليها الله اكبر الله أكبر خمسة وخميسة .. صيدلانية ... أيووووووووه وكمان عندها صيدلية وطبعا كل اللي هيعرف كده هيحقد على البت ويفتكرها معاها فلوس أد كده ... أحب أطمنكم جميعا انها مفلسة زي حالاتنا ... بس أهو الصيت ولا الغنى :D
آلاء من النوع اللي كرامته بتنقح عليه حبتين بس من جواها ناعمة وقوية وكلها حنية .... وبتكابر كتير وبتعاند وبتعمل نفسها سبع رجاله في بعض ولما بتكلم عن مشاعرها تجاه (her S) مبتقولش الواطية كل حاجة بصراحه بس على ميييييييييين أنا فاهمه كل حاجة من غير ماهي تقول
بمناسبة (her S) ... اتعرفت آلاء عليه في ظروف غامضة :D
صحيت من النوم في يوم وباسأل سارة "فين آلاء" قالتلي "خطوبتها النهاردة " ... طيب على مين وازاي وامتى وفين دي كانت لسه معايا ومقالتش حاجه .. سارة قالت ان كل حاجة جت بسرعة .. هو مش بسرعه بس لأ هو بسرعة الريح في 5 أيام ... وعشان كده بقى باعتبر ان آلاء و (her S) اتعرفوا واتخطبوا في ظروف غامضة
كان نفسي أحقد عليها لما اتخطبت بس الصدمة مدتنيش فرصة أحقد :( .. معلش بقى تتعوض مع سارة ان شاء الله
كانت معكم
ايناس (معرفش هما ناويين يسموني ايش في قصتنا الأسطورية)
آلاء .... صاحبتى اللى
بتفتح الفيس علشان تبيع
اللى بفضل اكلمها ساعة وف الاخر ترد عليا بايموشن (بحس انى ممكن اتشل ساعتها )
اللى بفضل اكلمها ساعة وف الاخر ترد عليا بايموشن (بحس انى ممكن اتشل ساعتها )
انا اصلا مش عارفة ايه اللى مصبرنى عليا
يلا اهو ثواب وبكسبه فيها
تشوفها من بعيد تقول البنت دى لوح تلج
بس لازم تقربلها علشان تعرفها كويس
شخصية لازم تشدك
وكل ماتقرب تشدك اكتر
هتلاقيها العاقلة الكاملة (سامحنى يارب ) اللى تقدر
تعتمد عليها
بس بعد ماتديك فوق دماغك تقول : كانت وقعة مربرة
يوم ماعرفتك J
بدايتنا سوا كانت خناقة مكوة ف سكن الطالبات من
5 سنين( انا مش فاكرة الموضوع ده خالص والحمد لله )
دلوقتى مش بشوفها خالص لكن كأننا عايشين سوا ف كل
تفاصيل حياتنا
علاقتنا اوقات كتير بحس ان انا اللى ماسكاها ولو
فلت ايدى هتنهار
بس ارجع واقول انها احلى حد عرفته (سامحنى يارب تانى
)
هي ونورا طبعا :)
كانت معكم : سارة
نهاية الحلقة التانية
نهاية الحلقة التانية
ليست هناك تعليقات:
إرسال تعليق